Mánudagur – Ofnbakaður fiskur

Mér finnst alltaf jafn gott að borða fisk og ég elska hvað það er hægt að elda hann á marga vegu. Ég hef sankað að mér helling af góðum uppskriftum og hér kemur ein.

 

600 gr fiskur
1 tsk salt
1-2 msk pipar
2-3 msk karrý
Hveiti
Egg
1/2 box sveppir
1-2 paprikur að eigin vali
2 gulrætur
Matreiðslurjómi
Rifinn ostur

Egg og hveiti sett í sitthvora skálina, salt, pipar og karrý sett út í hveitið. Fisknum velt upp úr eggi og svo hveiti/kryddblöndunni og svo raðað í botninn á eldföstu móti. Grænmetið skorið í litla bita og sett í skál, matreiðslurjómanum blandað saman við (má krydda smá meira ef vill). Blöndunni hellt yfir fiskinn og rifnum osti stráð yfir. Sett í ofn á 180° í 25-30 mín.

 

Þriðjudagur – Ekki-crepes

Stundum langar mig í crepes…en nenni ekki að búa til crepes. Þá nota ég bara tortillakökur í staðin.

Ég nota:

totrillakökur

karríhrísgrjón (þessi hér)

sinnepssósa

skinka

púrrulaukur

paprika

gular baunir

rifinn ostur

 

Allt skorið smátt og sett á tortillakökur – byrja og enda á osti og set svo aðra trotillaköku ofan á. Hitað í ofn í 10 mín. á 160°.

 

Miðvikudagur – Pastaréttur

Við elskum þennan pastarétt og ég elda hann mjög oft. Tilvalið að setja meira grænmeti út á hann sem er komið á síðasta séns í ísskápnum

 

Fimmtudagur – Súpa og nýbakaðar brauðbollur

Þessar brauðbollur eru algjört sælgæti nýbakaðar og volgar. Mér finnst gott að bera þær fram með góðri súpu eða öðrum réttum t.d. lasagna eða pasta.

 

Hvítlauksbrauðbollur

1 pakki þurrger

1½ bolli vatn

1 msk sykur

80 g rifinn ostur

1 ½ tsk hvítlauksduft

1 tsk salt

1 tsk basilíka

1 tsk óreganó

3 msk olía

4-5 bollar hveiti

 

Leysið þurrgerið upp í volgu vatni. Bætið sykri, hvítlauksdufti, salti, basilíku, óreganó, olíu og hveiti saman við og hnoðið vel saman (ég nota hnoðarann á KitchenAid vélinni). Látið hefast í 30 mínútur á hlýjum stað. Mótið þrjú snittubrauð eða bollur úr deiginu og látið hefast aftur í 30 mínútur.  Penslið deigið með þeyttu eggi og stráið rifnum osti yfir. Bakið við 180° í 20-25 mínútur.

 

 

Föstudagur – Heimabökuð pizza

Hér fær eldri heimasætan að baka sína eigin pizzu er það einn af hápunktum vikunnar og algjör óþarfi að breyta út af vananum.

 

Laugardagur – Mangókjúklingabitar

Þessa uppskrift prófaði ég í síðustu viku og þessir kjúklingabitar slógu alveg í gegn og verða pottþétt gerðir aftur og aftur. Virkilega einföld uppskrift og matreiðsla.

 

Sunnudagur – Boeuf bourguignon

Ég fæ bara vatn í munninn við að lesa þetta! Þessi réttur er náttúrulega bara með þeim betri. Ég fann ekki uppskriftina sem ég nota en hún Svava á Ljúfmeti klikkar seint svo ég læt fylgja með link á uppskrift frá henni.