Sítrónu- og bláberjakaka með rjómaostakremi

by Ásdís Geirsdóttir / 15/04/2017
Sítrónu- og bláberjakaka með rjómaostakremi

Þessi kaka er alveg einstaklega sumarleg og skemmtileg tilbreyting frá súkkulaðikökunni. Ég bauð upp á þessa í einu páskaboðinu hjá mér og hún þótti virklega góð.

Sítrónu- og bláberjakaka

2 egg

200 g flórsykur

200 g smjör við stofuhita

230 g hveiti

1 tsk lyftiduft

1 1/2 dl sjóðandi heitt vatn

2 tsk vanilludropar

hálf sítróna – bæði safi og börkur

1 1/2 – 2 dl bláber (eftir smekk)

Ofninn hitaður í 175°C. Egg, flórsykur og smjör hrært saman í 2-3 mínútur þangað til blandan er orðin létt og ljós. Hveiti og lyftidufti síðan bætt út í blönduna og hrært vel. Vanilludropar, vatn, sítrónusafi og sítrónubörkur sett út í og hrært vel þangað til deigið verður slétt. Að lokum eru bláberin sett út í og blandað saman við með sleif. Deigið sett í tvö hringlaga form og bakað í 25-30 mínútur.

Rjómaostakrem með sítrónubragði
230 g smjör við stofuhita
1 pakki flórsykur
3 tsk vanilludropar
100 g hvítt súkkulaði
125 g rjómaostur
1 msk sítrónusafi

Smjör, flórsykur og rjómaostur þeytt saman þar til blanda verður silkimjúk. Hvítt súkkulaði er brætt yfir vatnsbaði og bætt út í kremið ásamt vanilludropum og sítrónusafa. Mikilvægt er að þeyta kremið þar til það verður alveg mjúkt en það getur tekið 4-5 mínútur. Kremið er síðan sett á milli og ofan á kökubotnanna þegar þeir hafa fengið að kólna alveg.

Facebook Comments
Ásdís Geirsdóttir

Ásdís er 29 ára í sambúð með Alberti Gissurarsyni og saman eiga þau tvær dætur, þær Kristínu Dalrós 6 ára og Dísellu 2 ára, og einn dreng sem kom í heiminn þann 11. mars sl. Ásdís er íslenskufræðingur að mennt og starfar í leikskóla og í Fífu barnavöruverslun. Hún hefur áhuga á öllu sem tengist hönnun, handavinnu, uppeldi barna, bakstri og heimilinu - eins og sjá má á hönnun hennar Rammagull og RÓ.